Festin għad-Dakkara | Album: In-Naħla Katerina ‪@KaterinaHoneyBee‬

Il-kanzunetta “Festin għad-Dakkara”, li ħarġet fis-16 ta’ Ġunju 2025 biex timmarka l-bidu tal-Ġimgħa tad-Dakkara, kienet it-tieni minn tliet kanzunetti mnedija fl-2025 bħala parti minn inizjattiva usa’ maħsuba biex tippromwovi l-għarfien ambjentali u t-tagħlim tal-lingwa permezz tal-mużika. Din l-inizjattiva kienet tifforma parti mill-proġett “Edukazzjoni dwar in-Naħla Maltija permezz tal-Kanzunetti u r-Rimi”, appoġġjat permezz tal-Iskema ta’ Appoġġ għal Inizjattivi Żgħar (SIS), amministrata mill-Kunsill Malti għas-Settur tal-Volontarjat (MCVS) u ffinanzjata mill-Ministeru għall-Inklużjoni u s-Settur tal-Volontarjat (MIV). Imfassla għal tfal bejn is-7 u l-10 snin, il-kanzunetta tat il-ħajja lid-dinja tad-dakkara b’mod mimli kulur, immaġinattiv u edukattiv. Miktuba minn Rita Pace, b’mużika ta’ Augusto Cardinali u interpretata minn Christabelle Scerri, “Festin għad-Dakkara” hija ċelebrazzjoni ferriħija tar-relazzjoni speċjali bejn il-fjuri u d-dakkara tagħhom — fosthom in-naħal, iż-żunżan, id-dubbien u ħafna oħrajn. Minflok tiffoka biss fuq in-naħla tal-għasel, il-kanzunetta tenfasizza r-rwol essenzjali li għandhom id-dakkara kollha, inkluża d-dubbiena li ħafna drabi ma tingħatax l-attenzjoni li jistħoqqilha, fiż-żamma ta’ ekosistemi b’saħħithom. Fil-qalba tal-messaġġ tal-kanzunetta nsibu tieġ bejn il-fjuri, li jingħata l-ħajja bil-ferħ mid-dakkara permezz tal-att maġiku tad-dakkir. Bi kliem ferrieħi u melodija ritmika, id-dakkir jiġi ppreżentat b’mod immaġinattiv bħala festa ta’ tieġ immexxija min-Naħla Katerina, li tistieden lit-tfal japprezzaw u jipproteġu l-bilanċ delikat tan-natura. Lil hinn mill-messaġġ ekoloġiku tagħha, il-kanzunetta serviet ukoll bħala riżorsa għanja għat-tagħlim tal-lingwa. Permezz ta’ vokabularju ferrieħi u adattat għall-età, hija għenet lit-tfal f’diversi stadji tal-iżvilupp tagħhom fil-lingwa Maltija. Ir-ritornell li faċli jibqa’ f’moħħ dak li jkun, flimkien mar-ripetizzjoni, għen biex jissaħħu l-għarfien fonemiku, il-pronunzja u l-memorja, u b’hekk il-kanzunetta kienet partikolarment effettiva kemm fil-klassi kif ukoll f’ambjenti informali. Kitba: Rita Pace Mużika: Augusto Cardinali Arranġament mużikali: Augusto Cardinali Interpretazzjoni: Christabelle Scerri Direzzjoni u produzzjoni: Abner Joe Buttigieg u Dylan Farrugia Irrekordjata fi: AC Studios, Raħal Ġdid, Malta Disinn u produzzjoni tal-filmat: Michael Piscopo © 2025 Fondazzjoni għall-Konservazzjoni tan-Naħla Maltija ________________________________ FESTIN GĦAD-DAKKARA ________________________________ Hawn min hu insett ħuttab, Jgħin lill-fjur tal-wied jinħabb. Ejja nagħmlu dal-festin, Tieġ bejn fjuri maħbubin! Illum se jiżżewġu l-fjur, In-Naħla Katerina ddur, U tiġbor il-meraq u t-trab Li f’kull fjura dan jinsab. Araw ftit kemm għandna ġuħ! Jistedinna l-ward ifuħ. Bil-kuluri jitbissmulna, Tal-għajnuna jpattulna. Festin tista’ tara Bejn fjuri u dakkara. Man-Naħla Katerina ġew, L-għarajjes ġa lebsin – xi ħlew! U b’hekk jistednuna, Il-ward iħajruna, Biex huma jibdew jinnamraw Filwaqt li aħna ndakkru u nixxalaw! U kif aħna nwasslu t-trab Fejn l-għarusa tkun tinsab, Il-petali jaqgħu – ara! U bis-saħħa tad-dakkara… Din il-qalba frotta ssir – Kemm hi tajba, xi pjaċir! Dawn il-fjuri teqirdux, Għax inkella ma nsibux… Fejn intellgħu l-festin Biex ikollkom dal-frott bnin! Żnażan, naħal u dubbien Jgħinu jsebbħu kullimkien! Festin tista’ tara Bejn fjuri u dakkara. Man-Naħla Katerina ġew, L-għarajjes ġa lebsin – xi ħlew! U b’hekk jistednuna, Il-ward iħajruna, Biex huma jibdew jinnamraw Filwaqt li aħna ndakkru u nixxalaw! Hemm sala tat-tieġ f’kull fjura – Araw il-ġmiel tan-natura! Dil-katina bejn il-ħlejjaq: Wieħed tgħarras, l-ieħor trejjaq… In-Naħla Katerina u sħabha l-ħanfus, Xi għasfur, farfett gustuż – Dubbien magħhom hawn qegħdin – Għall-festin dawn mistiednin! Hawn biex jixba’ żgur kulħadd, B’hekk kulħadd issodisfatt. Kemm kieku sabiħ illi wkoll il-bnedmin Jikkoperaw b’dal-mod ma’ xulxin! Festin tista’ tara Bejn fjuri u dakkara. Man-Naħla Katerina ġew, L-għarajjes ġa lebsin – xi ħlew! U b’hekk jistednuna, Il-ward iħajruna, Biex huma jibdew jinnamraw Filwaqt li aħna ndakkru u nixxalaw! Ċaħda ta’ responsabbiltà: Dan il-proġett ġie ffinanzjat permezz tal-Iskema ta’ Appoġġ għal Inizjattivi Żgħar (SIS), amministrata mill-Kunsill Malti għas-Settur tal-Volontarjat (MCVS) u appoġġjata mill-Ministeru għall-Inklużjoni u s-Settur tal-Volontarjat (MIV). Dan il-proġett/din il-pubblikazzjoni tirrifletti biss il-fehmiet tal-awtur, u l-MCVS ma jistax jinżamm responsabbli għall-kontenut tagħha jew għal kwalunkwe użu li jista’ jsir mill-informazzjoni li tinsab fiha.