Policy 2.0 KN06 | Ардчиллын ухралтын нийтлэг (бус) хэв шинжүүд

Улс төр, эдийн засаг, хөгжлийн ойлголт олгож, бодлогын илтгэл бичих арга зүйд суралцах “Policy 2.0” хөтөлбөрийн “Keynote Speaker Series”-ийн зочноор судлаач Г.Гэсэр (PhD) оролцлоо. Тэрээр ардчиллын ухралт гэж юу болох, улс орнуудад хэрхэн илэрдэг, түүнийг ямар үзүүлэлтээр хэмжиж, үнэлэх боломжтой талаар өөрийн докторын судалгаанд тулгуурлан танилцуулсан юм. Мөн Венесуэл, Польш, Унгар болон Монгол Улсын жишээгээр ардчиллын ухралтын шалтгаан, явц, үр дагаврыг тайлбарлаж, 192 улсын 2012–2022 оны мэдээлэлд үндэслэсэн судалгааныхаа гол үр дүнг хуваалцлаа. Онцлох дүгнэлт (Highlighted insights): 📌 Ардчилал гэнэт бус, бага багаар ухардаг. Орчин үед ардчиллын ухралт заавал төрийн эргэлт, ил тод хүч хэрэглэсэн үйл явцаар илэрдэггүй. Харин хууль, Үндсэн хуулийн өөрчлөлт, ардчиллыг хамгаалах ёстой институцүүдийг ашиглах замаар аажмаар явагдах боломжтой. 📌 Ардчиллын ухралт улс орон бүрд ижил замналаар явагддаггүй. Ардчиллын ухралт эхлээд иргэний эрх чөлөө, эрх зүйт төр, хяналт-тэнцлийн тогтолцоонд илэрч, дараа нь сонгуулийн шударга байдалд нөлөөлдөг гэсэн нийтлэг тайлбар бүх улсад тохирохгүй. Судалгааны үр дүнгээс үзэхэд ухралтын хэлбэр, дараалал нь улс төрийн дэглэмээс хамааран ялгаатай байна. 📌 Шударга сонгууль бол ардчиллыг хамгаалах суурь нөхцөл. Судалгааны үр дүнгээр сонгуулийн ардчиллын үзүүлэлт нь либерал ардчиллын үзүүлэлтийн өөрчлөлтийг урьдчилан таамаглахад чухал ач холбогдолтой байгааг харуулжээ. Тиймээс ардчиллын ухралтаас сэргийлэх, тэсвэрлэх чадварыг бэхжүүлэхэд шударга, чөлөөт сонгуулийн тогтолцоог хамгаалах нь онцгой ач холбогдолтой. #Policy20 #KeynoteSpeakerSeries #Thinkers #DemocraticBacksliding #Democracy #PoliticalScience #PublicPolicy #DemocraticResilience