نسيتوا الأسياخ! كباب دجاج بالصينية بطعم بيجنّن طريقة الصينية عملت كل الفرق!

كباب الدجاج بالصينية المقادير: 1 كيلو فخاد دجاج مسحّبة بدون جلد ممكن نص فخاد ونص صدور، بس الفخاد بتعطي نتيجة أطرى وأجوس. 1 فليفلة حمرا 1 بصلة 2 حص ثوم بقدونس 2 ملعقة كبيرة زيت زيتون أو زيت نباتي 1 ملعقة كبيرة خل أبيض حوالي ½ ملعقة كبيرة ملح، أو حسب الرغبة 1½ ملعقة كبيرة معجون طماطم ¾ ملعقة كبيرة بابريكا 1 ملعقة صغيرة كركم 1 ملعقة صغيرة زنجبيل بودرة 1 ملعقة صغيرة فلفل أسود ¼ ملعقة صغيرة كمون قليل من الزيت لدهن الصينية ورش الكباب الطريقة: نطحن الفليفلة الحمرا مع البصل والثوم والبقدونس والزيت والخل والملح. نضيف الدجاج ونطحنه، وعلى دفعات إذا كانت كمية الخلاط صغيرة. نضيف معجون الطماطم، البابريكا، الكركم، الزنجبيل، الفلفل الأسود والكمون، ونطحن حتى يصير الخليط متجانس. إذا الخضرة نزلت مي كتير، منصفّي منها شوي حتى ما تكون خلطة الكباب رخوة زيادة. نريح الخليط شوي بالبراد. ندهن صينية بقليل زيت، ونمد خليط الكباب فيها بسماكة متساوية. منعمل خطوط وتقطيع بشكل أصابع كباب، ومنعلّم على كل قطعة حتى تاخد شكل الكباب. نرش فوق كل قطعة شوية زيت. تدخل فرن محمّى مسبقاً على 180° مئوية، حرارة من فوق وتحت، حوالي 15 دقيقة تقريباً أو حتى تستوي وتاخد تحميرة حلوة، من دون ما ننشفها. رز البسمتي بالكاري المقادير: حوالي 1 كوب رز بسمتي طويل الحبة بصلة، منبرش منها شوي زيت أو زبدة أو سمنة 1 ملعقة كبيرة كاري 1 مكعب مرقة دجاج مي حسب كمية الرز الطريقة: ننقع الرز حوالي 30 دقيقة ونصفّيه. نقلي شوي بصل بالزيت أو الزبدة. نضيف الكاري ونقلبه شوي مع البصل حتى تطلع ريحته. نضيف الرز ونقلبه. نضيف مكعب مرقة الدجاج والمي. نغطي ونتركه على نار هادية حتى يستوي ويتفلفل. صوص اللبن المقادير: لبن سميك، لبن مصفّى أو Greek yogurt بقدونس مفروم ناعم ½ حص إلى حص ثوم صغير مبروش رشة كمون رشة بابريكا عصرة حامض ملح حسب الرغبة الطريقة: منخلط كل المكونات مع بعض منيح، ومنقدّم الصوص بارد جنب كباب الدجاج والرز. أهم سر بالوصفة: ما تكثّر سوائل بخليط الكباب، واستعمال الفخاد المسحّبة بيساعد كتير يطلع طري، رطب وجوسي وما ينشف بالفرن.