Հետո չասեք՝ վա՜յ․ ինչու է պետք պատրաստ լինել այսօր

«Հայր և որդի Վարդանովներ» փոդքասթի այս թողարկման ընթացքում Վարդանովներն անդրադառնում են համապարփակ պաշտպանության և ազգային դիմակայունության թեմաներին։ Զրույցում խոսվում է հայրենիքի պաշտպանության գործում յուրաքանչյուր քաղաքացու դերի, ազգ-բանակի ձևավորման, այս ուղղությամբ առկա անելիքների և քաղաքացիների պատրաստվածության կարևորության մասին։ Անդրադարձ է կատարվում սահմանների ամրապնդման, կարևոր նշանակություն ունեցող տարածքների անվտանգության ապահովման և այդ նպատակով հասարակության ներուժն ու կարողություններն արդյունավետ օգտագործելու անհրաժեշտությանը։ Քննարկվում է նաև հասարակական կազմակերպությունների և քաղաքացիական նախաձեռնությունների դերը համապարփակ պաշտպանության համակարգում։ Առանձին քննարկվում է 25-օրյա վարժական հավաքների հարցը՝ ներառյալ այն դեպքերը, երբ դրանք կարող են կիրառվել որպես պատժելու միջոց։ Զրույցում անդրադարձ է կատարվում նաև հայրենիքի տարածքների նշանակությանը։ Խոսվում է այն մասին, որ նույնիսկ մեկ հեկտարը կարող է ունենալ կարևոր, որոշիչ նշանակություն, և որ որևէ տարածք չպետք է գնահատել որպես «ընդամենը մի քանի հեկտար»։ Այդ տարածքների համար մարդիկ պայքարել են, զոհվել, իսկ դրանց պահպանման ու պաշտպանության համար թափվել են քրտինք, արյուն ու արցունք։ Վարդանովներն ընդգծում են, որ պատրաստվածության և պաշտպանության մասին խոսելը պատերազմի կոչ չէ։ Խոսքը խաղաղ պայմաններում պատրաստվելու, հասարակության ներուժը համախմբելու, պաշտպանունակությունն ամրապնդելու և հնարավոր ճգնաժամերին ու արտակարգ իրավիճակներին դիմակայելու կարողություն ձևավորելու մասին է։