Qaaci | Heesta Surmaseegto iyo Maansada Sirmaqabe | Silsiladdii Siinlay | @BandhiggaBalwo

Labada heesood ee muuqaalkan ku jiraa waxay ka mid ahaayeen maansooyinkii uu Cabdiqeys kaga qeybqaatay Silsiladdii Siinley ee toddobaatanaadkii qarnigii hore sida weyn ugu dhex faaftay geyiga Soomaalida. Labada maanso oo aanu halkan qoraalkooda idiinku soo gudbin doonno waxa la kala yidhaahdaa Surmaseegto (Sarbeeb) iyo Sirmaqabe. Waxa codkiisa iyo kabankiisa isugu daray isla abwaankii sameeyay ee Cabdi Aadan Xayd (Cabdiqays). 00:00-09:28 Surmaseegto (Sarbeeb) "Samawade Hadraawow Markaad Saxarla' tirisaan Suubban kaaga celiyoo Sawdka aad ka tidhi iyo Maglay sadarradaadoo Kugu maan saluugin. Adigu maad sinbiidhin Gaarriye ma seegin Ogow Cali Saleebaan Isna si xun umuu hadal. Wax saan diiday saaxiib Safka kula wadaagee Saciid ugu horreeyaa Murtidii sirgacayee Waxa selelka' kiciyiyo Ma la socotay Riiraash Surmo-seegtaduu' dhigay? Af-qalloocna muu sugin Marinkaynu soconnoo Sarsar buu ka dhaafee Nin sagaashan jirayoo Hadal seegay weeyoo Tiisu ima saraysee Sallid iyo dillaal baa Sarifaaya hadalkee Saldhiggaygu wuxuu yahay Soomaalida ma caayine Ninkii soo socdaan idhi Dhulkeennaa samaadiyo Ha ka iman suddeenna? Dib baa laysu soogee Sed ka qaado hawshaan Taladii ku siiyoo Saakana la taagnahay Samir dhimay haddaan idhi Wakhtigoo sirgacan baan Siduu yahay tilmaamee Kuwa gabayga sirayow Si-xun-u-sheeg ma ogtiin Sixir wuu ka daranyoo Waa sida habkiinnee. Siinleyda waxaa dilay Sabigiyo dhallaankiyo Socod-baradka heestuba Saakaa ugu horreysee Surinkii Hadraawiyo Surya'daan anigu maray Suxul baa u aasane Sidaa maw ogsoontiin? Saboolkaan tilmaamiyo Halka saxalku yaallana Taa miyaa la socotaan? Kuwa selelku kiciyow Si-xun-u-sheeg ma ogtiin Sixir wuu ka daranyoo Waa sida habkiinnee? Waa sooryo maansadu Samo lagu wadaagee Sun ninkii ku darayow Aday sababi taadee Sahal maaha gabayguye Saqda dhaxaad u toostiyo Sacahoo looga faashiyo Sahan buu ku xidhan yahay Waa Saxarla' sheekadu Suubban iyo jacaylkee Idinkaa sahwiyayee Kuwa samaha rogayow Si-xun-u-sheeg ma ogtihiin Sixir wuu ka daranyoo Waa sida habkiinnee Soomaali wayddii" 09:29-15:01 Sirmaqabe: "Sarsarkayga midig iyo Saaxiibkay Caliyow! Axmad Ina Saleebaan? Saddiiqayga kaliyow Samaalow Hadraawow Axmad-dey ma seegine Aabbihii na sidayeen Silic nala jeclaynoow Soomaaliyoo idil Jaalleyaasha siman iyo Doolow idin salaannaye Intaan saymo lagu ridin Aan saxal addunyaad Iyo solayga naareed Ka sifeeyo Eebbuhu Ha ka dhigo safkeennee Hibo hayna saaree. Waxaan uga socdaa taa, Murtidaydii soohnayd Aan u dhaafo Siinkoo Sii daayo faraskee Subxaanka ina uumee Sifahaa qurxooniyo Sarta inagu dhechaan Simin aadmigeenoo Sida faraha weeyoo Waa la kala sarreeyaa Adduunyada sedkeedana Qofba subaxuu joogaba Waa laga sedcaaliye Waxaan uga socdaa taa Waxaan ahay nin saranoo Been laga sameeyoo Qaar si-xun-u-sheegiyo Nacab gudin ku saafoo Seedaha la gooyoo Dhiiggiisu saaxiib Togag uu sabbeeyee Ayagaa saxaayoo Kala saari doonee Guddidiisa sare iyo Guul-wade' ha lagu simo. Waxaan ahay nin saranoo Daalacan la saaroo Hadduu samo ku baaqana Si xun loogu rogayee Iyagaa saxaayoo Kala saari doonee Guddidiisa sare iyo Guul-wade ha lagu sim Waxaan ahay nin sabir loo Suryo loo hagoogoo Dabin lala sugaayee Iyagaa saxaayoo Kala saari doonee Guddidiisa sare iyo Guul-wade ha lagu simo. Waxaan ahay nin sabankiyo Saadaasha mooyee Aan siyaasad gelinoo Saymaha kalgacalkiyo Saxar' luun ka heesoo Lagu xidhay sabeenee yagaa saxaayoo Kala saari doonee Guddidiisa sare iyo Guul-wade ha lagu simo. Waxaan uga socdaa taa Anigiyo in ila siman Dhallintii suddeeniyo' Joogtay sabada Waaheen' Hadday wada safaadeen Sacab wada cayaareen Maxaa tayda uun sudhay? Qaar seereheenniyo Gurigeenna seexdaa Siddidii xumeeyoo Sacabkıl dhabqinayee Miyaa laga sahwiyayaa? Waxaan uga socdaa taa Kagga hilibka solayee Siniintana nacaayee Hadba sin u ordaayiyo Gaarriyiyo Saciidoow Miyaan tiinna lala socon? Ina Saalax waa kii Surin aad dedayseen Sadarrada ku sheegee Ma sagaal-wajliliyo Carsaanyoda' sideedaad Gaarriyoow siqaysaa? Waxaan uga socdaa taa, Weliyada siraatiyo Suufiyada dawaafana Saxar kama qarsoonee Gaarriyiyo Saciidow Laba balo u socotoo U saaxiibtay xumahaa Weligood isa seegtoo Saadda kuma heshiisee Waa maxay sirtaa beri Saamaha ku laabteen? Ma qaar saaca doorshoo Dad samaan u wada kacay Kala seexinaayoo Sun ku haystay uurkoo Dusha subag marsadayoo Saqda dexe habeenkii Sakalaayay uunkoo Xaqu uu sinbildhoo Rabbi seef ku jiidoo Kala saaray baad tiin? Waxaan uga socdaa taa, Ogoobey sideedaba Ninka ragi ma siibtoo Suuraddii ma guurtoo Carrabkiisa sare iyo Calooshii isma seegtoo Hadba siduu u jeediyo Kama weecdo surinkee Khaa' in baa sal fududoo Saacaddiiba midab lee Boqmo seerayaashoow In kastaa sagaafiyo Salawo iyo beeniyo Sahwi aydin wadateen Siinleydana ku sheegteen Gaarriyow sidaad tahay? Saciid baa ku dhaamoo Weli aan salsalinoo Sabadiisii joogee Summad laba-aflayntii Adigaa sameeyoo Way kugu sargo'an tahay. ....." #Bandhiggabalwo #heesokaban #somalimusic #qaaci