Khit Thit Morning News | 14 September 2026

Khit Thit သတင်းဌာန၏ စက်တင်ဘာ ၁၄ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ စက်တင်ဘာ ၁၄ ရက် မနက်ပိုင်း တင်ဆက်ပေးမယ့် သတင်းတွေကတော့ -ကချင်ပြည်နယ်၊ ဗန်းမော်မြို့နယ်ကနေ မန္တလေးဘက်ကို ပြန်လည်စုန်ဆင်းလာတဲ့ စစ်ကောင်စီတပ်ရဲ့ သင်္ဘောတွေကို KIA ဦးဆောင်တဲ့ ပူးပေါင်းတပ်တွေက ဒရုန်းတွေနဲ့ တိုက်ခိုက်ခဲ့ရာ သင်္ဘော ၆ စီး ထပ်မံပျက်စီးခဲ့သွားတယ်လို့ KIA ရှေ့တန်းသတင်းရင်းမြစ်တွေက ပြောပါတယ်။ မြန်မာစစ်ခေါင်းဆောင်မင်းအောင်လှိုင်က ဧပြီလမှာ သမ္မတရာထူးရယူပြီးနောက် နိုင်ငံတကာ အထီးကျန်မှုလျှော့ချဖို့နဲ့ နိုင်ငံခြားအစိုးရတွေနဲ့ ဆက်ဆံရေး ပုံမှန်ပြန်ဖြစ်လာဖို့ အိမ်နီးချင်းနိုင်ငံတွေနဲ့ သံတမန်ဆက်ဆံရေးတွေ တိုးမြှင့်လာပေမယ့် အာဆီယံနိုင်ငံအတွင်း မြန်မာ့အရေး သဘောထား ကွဲလွဲနေ ဆဲဖြစ်တယ်လို့ DW သတင်းမှာ ဖော်ပြထားပါတယ်။ ချင်းပြည်နယ်၊ ပလက်ဝခရိုင်၊ AA ထိန်းချုပ်ထားတဲ့ ဆမီးမြို့နဲ့ မတူပီမြို့နယ်ကြားက ဘွေလီကျေးရွာကို စစ်တပ်က ဂျက်ဖိုက်တာနဲ့ ဗုံးကျဲတိုက်ခိုက်ခဲ့တာကြောင့် ကုန်စုံဆိုင်တစ်ဆိုင်၊ ထမင်းဆိုင်တစ်ဆိုင်နဲ့ ကားတစ်စီး ပျက်စီးခဲ့တယ်လို့ ဒေသခံတွေက ပြောပါတယ်။ ထွန်းသစ်စစီးပွားရေးနိုင်ငံတွေ စုပေါင်းထားတဲ့ BRICS အဖွဲ့ရဲ့ ခေါင်းဆောင်တွေဟာ စနေနေ့က အိန္ဒိယနိုင်ငံ နယူးဒေလီမြို့မှာ တွေ့ဆုံခဲ့ကြပြီး အရှေ့အလယ်ပိုင်းဒေသအတွင်း တင်းမာမှုတွေ မြင့်တက်လာနေတာကို စိုးရိမ်ကြောင်း ပြောဆိုခဲ့ကြသလို၊ ကုလသမဂ္ဂက ခွင့်ပြုထားခြင်းမရှိတဲ့ တစ်ဖက်သတ် အရေးယူပိတ်ဆို့မှုတွေကိုလည်း ရှုတ်ချခဲ့ကြတယ်လို့ ထုတ်ပြန်လိုက်တဲ့ သတင်းအပါအဝင် မနက်ခင်းသတင်းတွေကို တင်ဆက်ပေးပါမယ်။