PR Ramos-Horta ho PM Xanana Apela Atu Hametin Kultura Páz iha Timor-Leste

DILI, 4 Novembru 2026 – Prezidente Repúblika, José Ramos-Horta ho Primeiru-Ministru, Kay Rala Xanana Gusmão, hato’o satisfasaun tanba durante komemorasaun Loron Finadu, iha 2 Novembru, la rejista insidente ne’ebé bele estraga seguransa no órden públika. Tanba ne’e, Xefe Estadu ho Xefe Governu husu bá sidadaun hotu atu kontinua hanoin no respeita matebian sira, liuhosi hahalok di’ak no kontribuisaun bá páz no dame iha Timor-Leste. PM Xanana hato’o satisfasaun ne’e hafoin enkontru semanál ho Prezidente Repúblika, iha Palásiu Prezidensiál, Bairru Pité, Dili, kuarta (04/11). Iha enkontru ne’e, PR José Ramos-Horta hato’o saudasaun no apresiasaun bá populasaun tomak, liuliu juventude sira ne’ebé hatudu hahalok di’ak no responsabilidade durante selebrasaun Loron Finadu, ne’ebé hala’o ho dame no hakmatek.